የኢንፎርሜሽን መረብ ደህንነት ኤጀንሲ እና የሀገር መከላከያ ሚኒሰቴር የመረጃ ዋና መምሪያ ተደምረው በሚሰሩበት ጉዳዮች ዙሪያ ውይይት አድርገዋል

አዲስ አበባ፣ ሰኔ 21፣ 2010 - የኢንፎርሜሽን መረብ ደህንነት ኤጀንሲ (ኢመደኤ) እና በሀገር መከላከያ ሚኒሰቴር የመረጃ ዋና መምሪያ እንደከዚህ በፊቱ አብሮ የሚሰሩበትን ሁኔታ አጠናክረው ለመቀጠል ተስማምተዋል፡፡

ተቋማቱ የመረጃ መሰብሰቢያ፣መተንተኛ እና ማሰራጫ ስርዓቶችን በማዘመን ረገድ በጋራ ለመስራት ከመግባባት ላይ ደርሰዋል፡፡ ኢመደኤ የሚወስዳቸው ፕሮጄክቶችም የፍላጎት ክፍተትን በማጥናት እና ግልፅና ተጠያቂነት ያለው የፕሮጀክት አስተዳደር ስርዓት በመዘርጋት እንደሚሰራ ተገልጿል፡፡

በውይይቱ ወቅት ሌ/ጀኔራል ሀሰን ኢብራሒም በሀገር መከላከያ ሚኒስቴር የመረጃ ዋና መምሪያ ሃላፊ እንደተናገሩት የሀገሪቷን የመረጃ ማሰባሰቢያ፣መተንተኛ እና ማሰራጫ መንገዶችን ዘመናዊ በማድረግ በኩል በየጊዜው እያደገ የሚሄድ አቅም መገንባት ያስፈልጋል ብለዋል፡፡

አቶ ተመስገን ጥሩነህ የኢንፎርሜሽ መረብ ደህንነት ኤጀንሲ ዋና ዳይሬክተር በበኩላቸው  እንደገለፁት ኢመደኤ በአዋጅ የተሰጠውን ተግባር እና ሃላፊነት መሰረት አድርጎ በሀገር መከላከያ ሚኒስቴር ሥር ካሉ ልዩ ልዩ ተቋማት እና ከሌሎች ባለድርሻ ተቋማት ጋር ተደምሮ ይሰራል ብለዋል፡፡

ከዚህ ቀደም በፕሮጀክት አስተዳደር ስርዓት እና  የፕሮጀክት አፈፃፀምን አስመልክቶ በሚፈለገው ደረጃ ግንኙነት ያለመደረጉ የፈጠረውን ክፍተት በመቅረፍ እና በመግባባት እንደሚሰራም ዋና ዳይሬክተሩ ተናግረዋል፡፡

አቶ ተመስገን አያያዘውም የፕሮጄክት አስተዳደርን ውጤታማ ለማድረግ እንዲቻል ኢመደኤ የሚወስዳቸው ፕሮጄክቶች በአንድ የፕሮጄክት አስተዳደር ሥርዓት እንደሚመሩ ነው የገለጹት፡፡

በመጨረሻም ሌ/ጅኔራል ሀሰን ኢብራሂም እንደተናገሩት ሁለቱ ተቋማት ለጋራ ሀገራዊ ዓላማ የሚሰሩ በመሆኑ በአሠራር ሂደት የነበሩ ክፍተቶችንና ችግሮችን በመፍታት የራስ አቅምን አጎልብቶ የሃገሪቱን የመከላከያ ሠራዊት የመረጃ ሥርዓት ዘመናዊነት ይበልጥ በማጠናከር በኩል በጋራ መስራታቸውን ከምንግዜውም በላይ አጠናክረው እንደሚቀጥሉ በአፅንዖት ተናግረዋል፡፡https://youtu.be/AvA-qcfWPN4